و تغرست في حياتي كي الدعوة
مرة نحسها دعوة خير و مرة دعوة شر
كي المرض لمغير دواء .. كيف الداء
جريت في عروقي كي برد الشتاء
كي نتوحشك ..
نرعش
نجمد
نتكبس
نلوج على غطا ، نلوج عليك
وين ندور نلقاك
يا نجوم في السماء
يا بحر
و يا سماء
يا نسمة باردة تقشعر لبدن و تحير برشا حكايات
يا غناية
"نحب ١٥٥ حاجة فيك "
ضحكتك و رموش عينيك ..
يا نبضة
يا نفس يتقطع يتقص
يا مصيبة
يا عبادة
يا تحصيلة ..
تلهويثة
جواجم و برشا حس كلالي مخي تخمام
و نشد وردة نريشها
يحبني ميحبنيش ؟
يحبني ميحبنيش ؟ ...
نحبك عصفور جنة ترفرف في قلبي منغير جناحات
 وغزرتك بحر امان تشعشع كالنسمة في دنيا واسعة
#ريمرست في حياتي كي الدعوة
مرة نحسها دعوة خير و مرة دعوة شر
كي المرض لمغير دواء .. كيف الداء
جريت في عروقي كي برد الشتاء
كي نتوحشك ..
نرعش
نجمد
نتكبس
نلوج على غطا ، نلوج عليك
وين ندور نلقاك
يا نجوم في السماء
يا بحر
و يا سماء
يا نسمة باردة تقشعر لبدن و تحير برشا حكايات
يا غناية
"نحب ١٥٥ حاجة فيك "
ضحكتك و رموش عينيك ..
يا نبضة
يا نفس يتقطع يتقص
يا مصيبة
يا عبادة
يا تحصيلة ..
تلهويثة
جواجم و برشا حس كلالي مخي تخمام
و نشد وردة نريشها
يحبني ميحبنيش ؟
يحبني ميحبنيش ؟ ...
نحبك عصفور جنة ترفرف في قلبي منغير جناحات
 وغزرتك بحر امان تشعشع كالنسمة في دنيا واسعة

ريم الحرباوي

فما حاجة قوية في هالدنيا تستحق باش نكونو أقوى أكثر و أكثر لحاجة هذى هي كبر قوتك في إنك تستغنى على حاجة كنت تحبها ، حاجة وجعتك مرة و إثنين لازمها تخرج من حياتك مهما كنت متعلق باها و تحبها و متتصورش إنك تنجم تعيش من غيرها ، لا تنجم خاطر عمرها الدنيا ماتاقف على حاجة ، تاقف شوي و تقعد تستناك إنت وقتاش تتحرك و تكمل تعيش . بالطبيعة باش تعمل dépression' و تبعد عالعباد و العالم الخارجي و تنعزل مع روحك و تكره كل شئ أما بشوية وقت و برشا قوة منك باش تتفاجىء إنك ستغنيت على أكا الحاجة و رجعت تعيش بلا بيها و خير من قبل .. حياتنا هكا مبنية على قرارات ناخذوها ،قرارات مصيرية ، لازمك تقنع روحك في الوقت لي إنت تحب أكا الحاجة إنك يمكن يجيك نهار و تنجم تعيش بلا بيها . فما عباد يراوك برشا متسامح و محلاك و تعدى و وقت يبدا عندك أكا الإنسان لي تحبوا ديما تاخولو بخاطرو و تعمل le max باش متخليشوا مغشش ،يولي هو يراك أكا الإنسانة لي محلاها و تنجم تعدى الأغلاط ، يوهم روحو لي ديما هو الصحيح و الكل .. أما في لحقيقة ميعرفش لي إنت قاعد تضحي و تقاوم و لعباد لي كي كاكا صبرهم ميطولش يحبوا يكتشفو أكا الشخصية لي فيك و موش معناها هوما ضعاف و مينجموش يستغنوا بالعكس و قت ياخذوا أكا القرار باش يبعدوا يمشيوا و ميرجعوش و في خطوة ميوخروش.
موش ديما باش تقعد تعطي أعذار و تكون محلاك و تعطي لي هوما يحبوه   و في المقابل تاخو كان أقل ملي تستحق ..
سعات لازمك تسكر قلبك على حاجات تعودت إنك تكبش فاها  باش تنجم تعيش حياتك بشكل طبيعي .

ريم الحرباوي

أكا الوقت لي تبعد فيه على كل شئ و في نفس الوقت تخمم في كل شئ ، تستغرب من روحك كيفاش وليت ..وقت صدرك يتعبى كلام و منجمتش تحكي حتي لأقرب إنسان ليك ، و ساعات تقول يمكن ياسر لحكاية ماكاناش باش توصل هكا لو كان حكيت لمخبي وخففت على صدري شوية أما إنت إستسهلت لحكاية و قلت تو لوقت يتعدا و كل شئ يتبدل ، و لوقت تعدا و متبدل شئ و قعدت ساكت و مسكر على روحك و مكبش في خنارك و الكلام لي معبي شطر مخك لي منجمتش تحكيه و تشارك لي تحسو مع شكون ،و هكا علاش سعات   تحس روحك انت لي طلعت خاسر ..

ريم الحرباوي

تعرفو إلي الموت قرببة منكم برشا ، و رغم هذا تجرحو في بعظكم ، تبكيو بعضكم ، تحسدوا بعضكم حتي على أقل حاجة ، تنساو بعضكم ، متتفقدوش بعضكم .. تتعاركو على ابسط حاجة و تهزوا خشوماتكم على بعضكم بحجة الكبرياء و درا شنوة و متعرش إلي فمة موت تنجم تفك منك العبد لي تحبوا و تحرمك منو في الدنيا و تخليك تتخبط و تبكي و تحاسب في روحك علاش خليتو ؟ علاش بكيتو ؟ علاش جرحتو ؟ .. أقعدوا قراب أكثر  بالعباد لي تحبكم و تحبوهم عايلتك و صحابك و إسألوا عليهم ديما ، ميسالش حتي الدنيا خذاتك منهم في وقت وإلا جبرتك قرايتك و إلا خدمتك و بعدتك عليهم ميسالش متنسوهمش ديما أرجعولهم ،
تفكروهم حتي بكلمة .. حبوا بعضكم و فرغوا قلوبكم من البغض و الحسد و الكره. علاش تتلاعب بالمشاعر ؟ و إنت تعرف روحك ماكش قد المسؤولية ، علاش ميجيش لبالك إلي الإنسان أذاكا ينجم في لحظة يمشي من الدنيا و معاش باش يرجع ، يمشي و في قلبو وجيعة منك .. كيفاش باش تنجم تسامح روحك ؟ كيفاش باش تنجم تكمل تعيش ؟ .. حبوا بعضكم و فرحو بعضكم ، متنساوش بعضكم و إسألو ديما و تفقدوا بعضكم ، حاولو باش مشاغل الدنيا متبعدكمش على بعضكم ..
عنقوا بعضكم بمحبة ... الموت قريبة منا برشا .

ريم الحرباوي

سعات تحس روحك محبوس في الظلام رغم البرشا نور داير بيك ، تعرش تفسر حتي شنوة لي قاعد يصير معاك ، تحب تحكي اما متنجمش ، برشا كلام و برشا حس معبي راسك ، تتقلق من لاشئ ، داخل بعضك و باقي تلوج في لهوة من عند حد هكا منغير متطلبها ،حد يفهمك من سكاتك من غيبتك ، اما صعيب .. بعد تحكي بينك و بين روحك و تتذكر لي إنت باش تاقف مع روحك و ماتستني من حد باش يفهمك ويحس بيك . خممتش مرة بينك و بين روحك و إسألتها قداش عطيت و في المقابل شنية خذيت ؟ قداش حاولت باش تفرح عبد بلي تقدر لمهم بذلت مجهود و مقصرتش وفي المقابل شنية خذيت ؟ لوقتاش شتقعد تحرق في أعصابك هاو مسألش عليا و شبيني منيش من أولوياتو ؟ .. سعات تتمنى تصيح بأعلى صوت عندك و تقول راني عبد لحم و دم حس إفهم ، تخرج لي مخبي و ترتاح . على قد الوحش لي ياكلك بدنك و يكثر منو شردانك و ميزاجيتك المتقلبة حتي من كلمة توحشتك سعات تصعب عليك وقت ترا كان اللامبالاة . تضيع وسط مشاعرك لي معندك فاها حتي دخل ..
سعات تحس روحك برشا ضعيف .

ريم الحرباوي

وقت تحس قلبك مثقل على بدنك الكل موش كان صدرك
وقت تحس روحك رزنت و نفسك بسيف فيك يتحرك تقول قاعد تحتضر ، دمعتك لي حاصرها و تحب تهبط اما انت متحبش و قت لي تحب تخرجها تهرب منك ، تهرب من عينيك ..
تغمض عينيك و تحس روحك شاد قلبك فيديك و تسب فيه
و مبعد يجيك إحساس قوي تحب تفيق و تعنق روحك تلوجلها على دواء ، أما متلقاش خاطر عقارها طلع قوى ..
تبدا تلوج و تفركس في حاجة تكبش فاها باش تقوم ، أما تتذكر لي في كل مرة أي حاجة نقذتك و قومتك منفعتكش مقعدتش معاك زادت خنقتك و عاودت رجعتك لنفس الحالة .. تحس لعباد منفعتكش مفهماتكش . في كل مرة ترمي روحك خاطر ماكش مسؤول على مشاعرك على تصرفاتك كل شئ يجيك في فترة ضعف تلقى روحك في وسط مشاعر جديدة  باش تقوم أما إنت في لحقيقة باش تزيد تغرق .. بالوقت تو تتعلم حاجة إسمها فن اللامبالاة : اي حد شيبعد ، أي حد مفهمكش ، أي حد جرحك و قربلك بنضرة ، أي حد حللك في الثنية بحر و بعد خلاك باش يجيك وقت و تولي أبرد من البرود شئ معاد يأثر فيك وقتها تفهم و تعرف ل إنت شديت الثنية الصحيحة لي لازم تعيش باها ..

ريم الحرباوي

توحشتك و الوحش يقتل أكثر من البرد
نحب نلوج عليك
في البلايصك لي ديما فيهم
اما منعرفهمش
إلي نعرفوا لي إنت معبي كل تركينة من تراكن بدني
في عروقي ..في دمي
نفسك مخلط بالدم لي يجري فيا
نحسك ساكن فيا
نحس بيك وسطي ..
توحشتك أكثر من كل شئ
و نغير والله نغير
نغير و منقلكش
و نولي نغلي منسكتش
و نقوم نغني "زعمة النار تطفاشي و تولي أبرد من الثلج"
نغير عليك من حاجات تضويك و أنا سعات نظلم منضويش  ..
توحشتك و الوحش يقتل أكثر من البرد
غنيتك غنايات قلت بالك يتنحى الوحش
توحشت سماك و نعرف وين نلقاك
في كل زنقة من زناقي روحي
و في كل مرا تجي عيني في عينيك قلبي يدورو بيه جناين خضرا و يولي يدق بالقوى
و حتي كان شتهيت تبدلني ..
موش باش تكون بنفس هبالي نفس ريحتي ، فني و غرامي ..

ريم الحرباوي#