العبد الي غناية و لا شطحة على موزيكا يحبها تنجم تحسنلوو حالتو ؛ الي بركشة على قهوة مرة و كتاب و لا فيلم تنجم تنسيه في نهار خايب ؛ الي يعرف بالضبط كيفاه يدلل روحو و يفرهدها  يطيبلها حاجة بنينة ؛ يهزها و يخرج يحوس بيها يمسحلها دمعتها بيدو كي تبكي و يقلها  يزي أمان .. العبد الي ماهو يستنى في حد باش يفرحوو لا يعملو جاست باهي و لا يقلو محلاك  خاطر يعرف الي الفرحة يلزم هو يهديها لروحو قبل أي واحد العبد الي ميرميش قلبو بالساهل في يد يعرفها تنجم توجعو نهار من نهارات  و ما يجبرش روحو باش يبقى في بلاصة  ميرتاحش فيها و مع ناس ميقدروشو ؛ العبد الي حتى كان هو محروم مالسعادة يحاول يوصلها و يعطيها لغيرو الي مستعد يخسر كل شئ الا روحو ؛ الي مهما الدنياا هزتو و نفظتو مبطلش الحلمة و مزال يضحك و يستنى في غدوة و يقول ' أي انجّم ' ؛ الي كي يطيح هو الي يحمل روحو و يهزهاا و ينفض عليها الغبرة و يقلها سملا عليك ..الي يعدي ليلة خايبة وحدو يبكي و ما يرقدش و لا يخمم أما يعرف الي كي يفيق الصباح يلزمو يبدا نهار جديد و يخلي البارح على المخدة  يتزين و يخرج للدنيا بكل قوة .. العبد الي يعرف بالضبط كيفاه ينقص وجايعو كيفاه ينسى همومو وحدو وحدو مغير ما يستنى شي من حد صعيب تراه مغلوب ؛ صعيب كان الدنيا تنجم تهدو و لا تقهرو  صعيب يخسر .. صعيب يطيح ..

درت عليك الدنيا لين ساقيا حفاو مسلمتش متعبتش و في حبك موقفتش .. في بالي الدنيا موش باش تاقف عليك ياخي لقيت روحي نتبع  كل يوم في خطوات ساقيك ، في بالي زرعتلي وردات في كل تركينة من تراكن قلبي طلع شوك حافي جرالي دمي و همي .. في بالي عرفتك و معاك باش نعرف الحب منين هب و دب و نحس لي أنا نجم نتحب كيما نحب ، حبيتك بين إيديا فرحانة مرا مزيانة موش لمحبتي سارقة و خوانة متخونش عشرة سنين تي وبرا حتي كان جاو نهار و إلا نهارين .. لقيتك و قلبي خايف يرعش منك و من همك و حبك ، لوجت عليك خاطر مازال حبك يقتل فيا و كل يوم تنبت في عروقي شوكة جديدة مأيستش و من حبك مشعفتش ..

زعمة قلبي شبيه موش حاب يرجع للثنية و يشوف غيرك ، أي قتلك نسيتك .. زعمة نسيتك و إلا روحي دخلت في حيط و إلا تهزيت و تحطيت ، مصاب نذوبك من روحي تمشي و معاش ترجع اما نتي ديما مصعبها عليا لاك قاعد و لا ماشي كي حجرة الكيلوماتر من بلاصتك متحركتش توجع و تضحك و تبكي ،تزهيلي روحي و دخلني بعضي و تنسيني همومي و تمرضني و تعبني تي قيلني راك مرجتني .. تي شبيني صابني هذا الكل من وراك ، شقتلي ؟ ، قتلي منحبش نراك هكا ! .. فيبالك بعدك باش يقتلني ياذيني و يخليني بلا روح ، لا لا وجودك لي بيه كي بلاش هو لي يوجع فيا و إنت مرا هنا و مرة غايب زعمة زعمة لا نحبك و لا نصبر عليك تي سيب عليك .. قداش مديتلك يدي لين حسيتها ترعش تنمل شاح منها الدم حتي من عيني ذبلت من الغزرات ليك  ، نحب ديما نقلك راني نحبك نحكيلك على روحك فيا ولات حكاية برشا خنار حكاية حتي أنا مفهمتهاش .. كل شئ الطفيه و تحرقو بكلمة توحشتك تي هزني زحزحني لبلاصة بعيدة غطسني في الماء خرجني مبلولة مهبولة أيا فك عليا موش لازم تحبني و موش لازم تتوحشني ، نحب نخرج نبدل الروح إلي فيا تي والله راهي عملت فيا تي جاوبني ماكش قاعد تسمع فيا و إلا ساكت كالعادة متحاولش تسخف عليا تو وحدي نخرج العزا لي فيا أيا فك عليا من هاذي و هاذي تو نكتب و نخرج خناري تو نتكب و الكبي فيا يتكب نهبط و نتحط .. تي شيهمك فيا

مازلت ديما نكتبلك
برشا خنار في برشا كلام
و قداش من مرة نكتبلك و منوريكش
و قداش من مرة نشد عليك ساقية و منجيكش
و قداش خبيت كلمة نحبك في برشا كلام و بعد السلام و شنحوالك ياما تمنيتك
حلمت بيك
و شتهيت أكا الحلمة ماتموتش
حلمتي بيك كانت بسيطة
لافاها لا عرس و لاروبة بيضة
لا زازا لا سبعة أيام و سبعة ليالي
لا عباد تهني تتمجلغ و تبوس
حلمة بعيد عليهم
بعيد عالعادات و التقاليد
حلمة تلمني كان أنا ونتي
في دار ضيقة
كل شبر فاها يحكي حكاية
كل تركينة تحكي لحظة عشق و غرام
فيها برشة موزيكا و تخميرة و فن
فيها برشا حب نضيف موش مبني عالخنن
و حتي كان دوان الفم و كثر التخرنين و جات عركة
نختموها بشطحة هبال في جنينة عقاب الليل
و ترضيني ..
ببوستك لي على رقبتي
حلمت بسوايع نقعدوا نحكيو على كل شئ
عالفن
الدين
الجنس
و السياسة
في دويرتنا الضيقة
إلي لامة كل دمعة و كل ضحكة كا غزرة و كل تعنيقة ..
نحكيو عالمشاكل في الخدمة و خنار لعباد
تجبدني و تبلي إيجا عندي يعن دين والديهم
فكنا منهم
و إنت قداني شعرك سايب يا محلاه ..
نعديو نهارنا وحدنا
بين قهيوة
و كتاب
و صوتي الخايب و انا نغنيلك  في غنايات لطفي بوشناق :
"نحبك و نحبك و نزيد نحبك
و نحب الناس تعرفني نحبك "
ماو حببتك فاها و وليت نحلها ..
حلمة حلمتها بيني و بين روحي
حلمة خبيتها عليك
#ريمات

علمتونا بلي كل شئ حرام ، يزي متعملش هكا ، موش مسموح ، متعملش حاجة موش من ندك و من ند عمرك ، كل شئ عيب و كل شئ ميجيش ..
سعات يحسسونا إلي أحنا نعملو كان في الغلط ..
منجمش نقول لحد مبنك ، محلاك من غير منحس روحي نعمل في حاجة غالطة و إلا زايدة ..
منجمش  نضحك في الشارع منغير منحس لي أنا هبلت و يا طفلة نقص راو ميجيش هكا ، عيب في الشارع ...
منجمش نبكي قدام لعباد منغير منحس روحي إلي أنا مرا ضعيفة و لازم نكون قوية قدام لعباد ...
منجمش نحب منغير منخاف على بدني ..
منجمش نلبس لي نحب نتزين نتلون   منغير  منحس بلي لعينين لكل مرشوقة فيا ..
منجمش نخرج وحدي عقاب الليالي ندور منغير منسمع شو أكا الطفلة عقاب الليل فاش تعمل !!!
منحبش نحس منحبش نتفق معاكم منحبش رضاكم منحبش تعلموني ..
نحب نحس بيك كان إنت
نحب نعنقك و نبوسك و نشبع بيك كان إنت
نحب الدنيا الكل تخطاني و تفضالي كان إنت
نحب الدنيا تتغشش علينا تبعدنا ، تخطانا ، تفكنا
نحب نعنقك ..

قريب نغلق ال 22 عام من عمري ،
و كيما في كل عام فيبالي كبرت و باش نتعلم ...
نتعلم باش نستغنا على حاجتي منغير نويح
باش نتعلم من الكف لول
باش نتعلم نرقد كان على الجنب لي يوجع لين يبرا
باش نتعلم نعطي لكل خطوة كارها و منضعفش و نرجع لعباد حبيتهم
باش نتعلم نحب منغير تملك و أنانية
باش نتعلم نكسح قلبي في برشا مواقف
باش نتعلم نمد يدي كان للي يستحقني
إذا بيا أول نسمة كانت تهب عليا نرخفلها روحي و نرجع نضيع الثنية . و كل حد وجعني نلقا روحي مسامحتو ، و قعدت في كل غلطة نعوم و نغطس لين جواجيا كحالو ..
فيبالي كبرت و كيما حبيت باش نتحب
فيبالي  باش نعرف الحب منين هب و دب
فيبالي الدنيا باش تعطيني أي حاجة نحبها ..
أما تعلمت في ريتم  حياتنا لكلنا نغلطو و غلطة وحدة متكفيش باش تعلمنا ..
و رغم  هذا  الكل نحس  فما فرحة ديما لابستني من داخل
مازلت نحب قلبي خاطرو مازال يحب
مازلت نحب نعيش ..مازلت ديما نحلم
و هذا خاطر  ديما نحس فمة فرحة مخبية في تركينة مازال قلبي ماراهاش  .

كي دعوة الشر تبع فيا  ساكن في قلبي و معبي جواجيا .. لاني شرانية و لاني عدوانية أما علاش منك تغدرت عديتلك و قلت ميسالش كليتلي من لحمي لين شاح فيع منو الدم .. كل منقول راني نسيت يعرضني خيالك يتسرسب من كل ثنية .. كل منتذكر تزيد تسرح فيا تعشش فيا .. كلاني لهم و معادش عارفة كيفاش نرجع للثنية و نعاود نبني ساسي لي تهد .. حسك في راسي ماكلني ، مرض تغلل فيا عرف كل تفاصيل فيا حتي لين وليت حبل يقتل فيا سكينة تقطع فيا نار تحرق فيا .. وين نتلفت نلقي حاجة تذكر فيا  ضحكة غناية كلمة نسمة  خيال يتبع فيا روح سكنت عششت فيا .. حالة غمة مزمرة كان عليا ، تي فك عليا .. تقول عليك حاجة كحلة عميتلي عينايا و حجبت باش نرا غيرك ، ياخي بالحق كان إنت في هادنيا ؟ علاش علاش علاش زعمة انت ناقم عليا و إلا ناقمة على روحي ؟ مفهمتش شبيني زعمة حبيتك و إلا تجنيت بيك .. محيرني و مقلقني و مصعب عليا خطواتي .. نحب نفسخك ننسي لي إنت موجود ، زعمة لي خلقك مخلقش غيرك و إلا أنا مكتوبلي هكا مكتوبلي باش حيلي يتهد .. و إنت كي لمرض لصق فيا لا يفيد فيه لا دواء و لا طبيب .. و كان هكا مالا إنت طبيبي و دوايا .. أما إنت وينك عايش في دنيا أخرى ماكش هنا .. سعات نتغشش على روحي و نقول أنا مرا لقوية أما هاذي أكبر كذبة كذبتها على روحي ، خاطر لأم عمرها متنسى وليدها و الراجل عمرو مينسى عشيرتو و الطفلة عمرها متنسي ميمتها .. و أنا ننسي لعباد أما عمري مننسى ريحة لصقت فيا .. تو الجرح يبري و الخاطر يطيب و الحياة تقدم أما إنت روح مننسهاش ، وهاك عايش معايا حتي نموت و ندفنو فرد قبر و تقعد حتي في الٱخرة التبع فيا . #ريم

نحب نعيش بيك و تعيش بيا..
نموت عليك و تموت عليك
نذوقك من محبتي و نملالك باها عروق بدنك عرق عرق ..
نحب ديما معاك
موش نهار و إلا لحظة .. نحب سنين و سنين
نحب دنيا الكل
نفيق الصباح على صوتك و إلا بين إيديك
نحبك ليا مرايا
وين نشب تجري ورايا
و إنت وين ماتهب أنا وراك بنية دلولة مزيانة مغيارة خرنانة ..
خلينا منتفارقوش .. نتحداو كل شي و منبعدوش
نذوق من تعبك و شقاك
ننفضلك غبرت حزنك ندللك و نكون ديما حذاك
نحبك ليا راجل مغيار و حتي خرنان
وليد مزيان مهبول و ديما عليا ملهوف جيعان
نحبك بعيوبك الكل
و تحبني بتفاصيلي المزيانة في بدني الي موش مزيان ..
نحب نح س معاك ندوروها شليلة و مليلة
نبردك بتعنيقة في تركينة ضيقة
ونقلك نحبك يا إنسان
نحب نسكر بيك و بعد كل تبسيمة منك نموت فيداك
نحبك ديما تخطف مني بوسة على غفلة ديراكت منغير تمهيد بكلام حلو و لا موال
نحلك تعيشني عيشة ميزيرابل
نحبك تكون متاعي وحدي ببدنك بقلبك و أنا بكلني ليك ..

نحبك و منحب حد يحبك نحبك و منخليش حد يحبك قدي نحبك و منحب حد يشدك يحكيلك يضحكلك و يشكيلك ، نحبك قد السماء و الأرض و الشمس و القمرة و البحر .. نحبك و نغير عليك منهم و من نفسهم ضحكتهم و غزرتهم .. نحبك و نحب الدنيا الكل تبعد عليك و تخليني كان ليك انا وحدي ولدي لي نربيه و كان تغشش أنا نرضيه ، نحبك و نعشق حروف كلمة نحبك .. نحبك كي تحكيلي كل شئ ، نحب حسك غشك و كلامك .. نحبك وقت يهزني شرداني لبعيد لحلمة تزرعت في جواجيا نكبر معاك و نولي أم و نربي و نجيب منك بنية من نحاس تاخو مني الرقة و الإحساس و تاخو منك الكار و الوهرة و البرشة حنية ، بنية ڨد و الوهرة  طول و فيناس أزين من نوار الياسمين و الفل, بنية من دمي و دمك ريحتي و ريحتك  .. نحبك و معندي منعمل كان نحبك كل ساعة و كل نهار لين يتعدا بينا لعمر ، نحبك قد ماك ساكن عقلي نفسي قلبي و جواجيا ، نحبك و ميهمني في حد ، نحبك على كيفي بدلالي و بغيرتي .. نحبك و كل وحدة تحب تكلمك نخبيك ورايا و نقلها متاعي ملكي .. نحبك نعشق حروف كلمة نحبك .. #ريمات

تعرف و إلا متعرش
إلي أنا ياسر متوحشتك
توحشت حكاياتنا
كلامنا
غشنا
و ملامنا
توحشت سكاتك
توحشت كل شي فيك
تي حتي كذبك ، توحشتك
توحشت وقت كنت ليا
وقت كنت مني و فيا
سعات تضياق بيا
نشتهي نكلمك
نسمع صوتك و منتكلمش
منجمش ..
داخلة بعضي و معاش أنا لي نعرفها
قلبي هذا ما عاد قلبي
و روحي معادش هنا
مشات معاك
طارت و ولات عصيفرة جنة
و لعروق لي كانو مليانين بيك فيع منهم الدم
و خيالك مازال لابسني
و أنا مازلت نبكي
 إنت السر إلي نحكيه بيني و بين روحي هكا إنت باقي في عينيا
إنت فني و إنت لي عليه نغني
حتي و إنت بعيد نحبك يا فني
نعرف لي منتعوضش
و حتي كان حبيت تنساني ، حبيت تبدلني
موش باش  تكون في نفس محبتي ، نفس هبالي  نفس ريحتي ، نفس ذوقي و نفس غرامي ..

شنية معناها dépression ..
تحس روحك وحدك حد ماهو متلفتلك
و حتي كان قربلك حتي أقرب إنسان تحسو فقط يراعيلك في مشاعرك و بلي تحكي موش حاس بيك
في الفترة هاذيكا حتي شئ معاد يعجبك ، تبدا تلوج على أي شخص باش يحبك و يفهمك من سكاتك و هذا الي مستحيل تلقاه
تبدا تمشي في الشارع ماكش حاسب لعباد موجودين تحس روحك وحدك وسط هالأرض
حتي من كيتك و صوت موزيكتك ولاو يوجعولك راسك
تلقى روحك ديما وحدك موش معناها إنت تحب تحصر روحك أما فما حاجة من داخل كرهت كل حاجة دايرة بيك .
خاطر سعات وقت الغصرة و الضعف تتلفت متلقى حد بجمبك كان انت متحكيش حد ميحس بضحكتك لي  موش عادية و بتحويقة الزايدة  لي فوق عينيك ، بنبرة صوتك لي متبدلة ..
في الفترة هاذيكا تخليك تعرف شكون إلي بالحق يحبك خاطر كان حد مفهمك من تفاصيلك المتبدلة من غير إنت متحكيلو تفهم لي إنت ماكش مهم في حياة حتي شخص ، الفترة هاذيكا بصعوبيتها و خنقتها  تعلمك برشا حاجات وأهم حاجة تقربك لروحك برشا
الكلنا نتعداو  بيه  و ساعات برشا مرات في ضرف شهر ، إنت لي لازمك تقرر قداش باش تقعد فيه   ، و وحدك وحدك  تحاول ترجع لدنيتك و ضحكتك و الحاجات لتحبهم ..
وحدك لازمك تحاول تخرج منو ..

ريم الحرباوي

قريب نغلق ال 22 عام من عمري ،
و كيما في كل عام فيبالي كبرت و باش نتعلم ...
نتعلم باش نستغنا على حاجتي منغير نويح
باش نتعلم من الكف لول
باش نتعلم نرقد كان على الجنب لي يوجع لين يبرا
باش نتعلم نعطي لكل خطوة كارها و منضعفش و نرجع لعباد حبيتهم
باش نتعلم نحب منغير تملك و أنانية
باش نتعلم نكسح قلبي في برشا مواقف
باش نتعلم نمد يدي كان للي يستحقني
إذا بيا أول نسمة كانت تهب عليا نرخفلها روحي و نرجع نضيع الثنية . و كل حد وجعني نلقا روحي مسامحتو ، و قعدت في كل غلطة نعوم و نغطس لين جواجيا كحالو ..
فيبالي كبرت و كيما حبيت باش نتحب
فيبالي  باش نعرف الحب منين هب و دب
فيبالي الدنيا باش تعطيني أي حاجة نحبها ..
أما تعلمت في ريتم حياتنا لكلنا نغلطو و غلطة وحدة متكفيش باش تعلمنا ..
و رغم  هذا  الكل نحس  فما فرحة ديما لابستني من داخل
مازلت نحب قلبي خاطرو مازال يحب
مازلت نحب نعيش ..مازلت ديما نحلم
و هذا خاطر  ديما نحس فمة فرحة مخبية في تركينة مازال قلبي ماراهاش  .

خليتني وحدي خاطر معرفتش لي أنا لمرا لي نستحق الكلمة الباهية و اللهوة الزايدة ، خاطرك مقريتش وصفي ليك في كلامي ..
وحدي خاطرك ماريتش حبي ليك يقتل فيا ، نكتب و بين إيديا النار ، راسي يسطر ، قلبي لازمو عملية ..
حتي رغم الواقعية لي فيك توهمت إنك فاهمني ..
قالولي بيك و عليك يزي ارحم روحك شوية ، أما ميهمش ..
خليتني وحدي خاطر مريتش الغيرة عليك توجعلي في روحي ..
هانت عليك برشا حاجات و حق الرب لاباش تفهمها ..
وحدي خاطرك مازلت تصدق لي أنا ياسر قوية و منضعفش ..
وحدي من نهار لي وجعتني فيه ..
وحدي خاطر قلبي منك  مازال يحرق فيا ..
وحدي خاطر نحب نتنفس نفسك ..
 نحب نملا رواربيا بيك ..
و ديما نتوحشك اما منقلكش ..
وحدي خاطر منحبش نكون مفروضة عليك
وحدي خاطر يمكن حبيتك فيسع ..

سعات نشتهي ليام ترجع بالتوالي ..
ترجع بيا وقت ماكنتش نكتب
وقت كان قلمي خالي
وقت إنت مكنتش موجود
و من وقت لي جيت
و قلمي يجري حافي
مسيكن يسخف ذليل
مرة يكتبلك كلمات بنان من لوحش
و مرة مريض تاعب من التخلويض ليك و عليك ..
 لو كان نجمتك راني حكيتلك قداش قعدت نستني فيك
لو كان أنا نجمت راو حكيتلك أكا الكلمات لي لامتهم بين جواجيا ..
لو كان نجمت راو حكيتلك أنا قداش نغير عليك ..
منجمش و إنت مرة معايا و مرة بعيد ..
 و شخصت كان جاء كل شئ بالسيف  ..
راو حفرت عروق بدني عرق عرق و حطيتك فيهم ..
كان جيت تفهم في كار لمحبة راك لنهار وجعتني حتي بكلمة
راك مادرتش و مخممتش تشوف غيري ..
و كان مشيت  راك ماكش باش تقتلني
و كان حبيت
برا موت ..
ماك يا عاشق ليا يا ممقوت .

أريد ان أتجرد من كل الأشخاص و ابتعد عن روتيني اليومي ..
 ليس الأشخاص فقت بل حتي من نفسي ، أريد ان أختلي بروحي لعدة أيام ، لا لا !!
بل لعدة أسابيع ..
أريد القليل من الحرية لنفسي ، يمكن ان تبتلعني وحدتي و لكن على الأقل تشبعني بالقليل من الأمان ..
أريد ان أبتعد عن هذا العالم ، لست حزينة لهذه الدرجة و لكن ..
أريد ان أهرب بعيدا عن بعض الكذابين و المنافقين
أقرا ، اكتب ، أستمع إلي الموسيقي ، أشتاقه ،أحبه و عندما أحبه  تبدأ ألام جسمي ، أظن أن لا مفر من حبه هذا .
أريد أن أتجرد من مشاعري تجاهه التي و لحد هذه الساعة لم تهجرني ..
سأرقص و أغني
و لأني إمرأة تكره أن تكون ضعيفة !
سأدهس على كل أوجاعي و مخاوفي
أريد ان أجوب أزقة الشوارع عارية
 وحيدة في الساعات المتأخرة ليلا
حيث لا يوجد أحد
اترجل حافية صوب رائحة الياسمين ، و أقبلها ...
أبتلع الهواء الذي لم يشوهه أحد
أريد أن اتجرد من روحي
جسدي ..
و حتي من إنسانيتي ..
أرتمي في أحضان حريتي
و أضيع ...

موسيقي Armand amar تحيط بي و قهوتي بجانبي . أعترف ان كتابة المذكرات هي الوسلة الوحيدة للتخلص من الكلام الذي يملأ نصف دماغي ، عينايا متعبة من قلة النوم في الحقيقة أن هذه الفترة أميل لعدم الإهتمام ، أميل لعدم التفكير ، لست كارهة للسعادة لكني تعبت من نفض الحزن عني ، قد أصبحت فارغة من كل شئ ، داخلي كله فوضي ، قلبي يخطئ مرة  أخرى و كعادتي أشتمه من جديد  ، أنا أكرهني ...
أظن أن جسمي و روحي لشخص واحد گان يعلم من البداية أني لست مثلهم ، لست مادحة لنفسي لكني لست خائنة و لست بكاذبة . غلطتي الوحيدة أني دائما أرمي بنفسي في الأشياء وأعلم أنها ستكون خائنة مثلك ، و لاكني لا أتوسل للبقاء ، الرجاء ليس موهبتي ، أطلب الإهتمام كثيرا إذ إعترفت من قبل أني فتاة متملكة ليس في الحب فقط بل حتي في الصداقة ، قلت إما الأولوية أو العدم .
أقول أني سأمسكني و سأكون أقوي من أن يهزمني أمر تافه ، لكن الخيبات مازالت تطوف بي كطواف الكعبة ،أحاول الركض بعيدا عنهاا فأنا أكبر من كل خيبة
ليس بعد فمازلت أصبر ..

متحاولش
متحاولش تراني كيما إنت تحب ، تبدلني ، تصنعني ، و تعمل مني لمرا إلي إنت تتمناها ، متحاولش و متبذل حتي مجهود باش  تخلق مني مرا جديدة على كيفك ، على خاطر باش نبقي كيما أنا ..
أصلا حاولت نكون كيما إنت تحب  اما الله غالب منجمتش ، محملتش  ، تعرف علاش خاطر محبيتنيش ، خاطر محبونيش !!
عمري لاباش نتبدل و نكون كيما هوما يحبوني ، نحب نبقي كيما أنا الدخلانية .. مانيش كيما يقولو قاسية القلب و عقلي متحكم في كل الأمور ، صدقني أنا أبسط من هكا ببرشا .. صحيح متملكة و هذا يمكن يأثر على علاقتي بالعباد لي نحبهم ، صحيح نتغشش برشا و نغير برشا و هاذم حاجات تغرسو في روحي و رغم لي هوما يتعبوني أما منجمش نخرجهم مني .. أما بلي يكثر لومي و كلامي القاسي بلي نخبي وراه برشا وحش و محبة و حنانة .. ديما نتمني باش نلقى شكون يفهمني من تفاصيلي الصغيرة ، يخزرلي بقلبو ، يمشي معايا و مايقفش في شطر الثتية و بيا يرخ و ميظهرليش في لخر لي هو يهد و يبقي كان يمني ، منحبوش يبانلي في لخر لي هو تصويرة فارغة متصلح لشئ .. سعات نحس روحي كيما لمراية لمكسرة بلي حاولت نرجعها مركبتش و الي يجي يحاول معايا أول ميتجرح يمشي و ميتلفتش ، نحس لي أنا مكسورة من روحي موش من لعباد .. مكسورة من الدنيا و من الموت الي ملقيتلو حتي حل و يرجعلي المفقود ، و كي تجي تشوف تلقي لمخبي ورا هالوجه البارد و العقل الشارد أصلو مكشوف ..

أنا إمرأة تعاني من نقص هام في الفيتامينات ، و بالرغم من هذا لا ترغب في تناول الأدوية ، تقاوم السهر و تحب تلك الهالات السوداء التي تحت عيناها ، لا تريد النوم يقولون أنه للمكتئبين ، ربما ..
قاومت النسيان لكنها في كل مرة تفشل و تهزمها تلك الشاعر اللعينة ..
انا بخير
لكني اصبحت أشتمني كثيراا
أصبحت فارغة من كل شئ
ذلك الحب قد أنتهي
لكن لمذا لازلت أفتقدك ؟!
اريد ان أتجرد منك
مللت مقاومتك ..

مذكراات

"ريم أهربي "
عودي إلي غرفتك و أغلقي الباب بإحكام ، إرتمي كعادتك كجثة هامدة على فراشك ، تحدثي مع نفسك كعادتك ثم أمسك برفيقك المخلص قلمك و أكتبي
انا لست مكتئبة و لا أعاني من أمراض نفسية و فكرة الإنتحار ليست في مخيلتي ، أنا فقط منعزلة مع ذاتي علني أجد الخلاص من هذا الحزن الذي يحب أن يسكن روحي بين الفترة و الفترة .. يقولون أن البشر الذين يريدون الوحدة هم مكتئبون ، لكنني الأشخاص الذين  يشعور بالراحة عندما يكونون وحيدين ، لست بكارهة للعالم الخارجي و لكن مللت أحاديثهم التافهة و المملة.
لا تذهبي إلي المقاهي لمقابلة الأصديقاء ، أقصد الغرباء ؟!
غبية .. !!!
لا تريدين المزيد من الأصديقاء ؟!
أنا فتاة محبوبة و الأصديقاء محاطين بي من كل مكان .. لكن واحدة فقط جسدت لي عمق و قوة الصداقة ، البقية أحاديثهم تافهة و مملة ..
عزلتي هذه اعترف أنا سببها ذلك المسمى بالحب ..
أهو لعنة بالنسبة لك !؟
لا اراه لعنة بل هو عودة إلي إنسانية الإنسان ، الحب مسؤولية قبل كل شئ ، الحبيب كتف في أوقات الشدة و الأب الحنون .. غريبة أنا من دونه ، صوته موسيقي داخلي ، يشوش فكري احاول تجاوزه و لكن في كل مرة يزداد حدته حتي يصبح كالصداع
أنا فاشلة ..
إمرأة في النهاية لا تطاق ؟!
روحي مازالت حية أصغي إليها في صمت و إنصات
سوف أمسكني ...

ساعات لكلام يتجمد فيك  ،لا تنجم لا تحكي و لا تفسر انت شنوة تحس ، انت فاش تعاني ، حتي مع روحك لي ديما تحكي معاها تجيك أيامات حتي هي تبعد عليك، تقعد تغزر كان للماشي و جاي  ،ديما شارد و أي حس يوجعلك راسك ، حتي الموزيكا لي ديما تبننلك قعدادك تفد منهاا ، تولي تلوج على الرياض ، يمكنك التخمام و تحس في بدنك سخن ،مخك يتحرق و متلقاش تفسير للي قاعد صايرلك  تحب تصيح و تعيط مغير متحس روحك هبلت و إلا صارتلك حاجة .. لعباد لي تبعد و فاتت ثنيتك علاش ترجع ؟! لعبد لي يبكيك و يخليك تتخبط و تمخط في دموعك يمشي و يخليك و بعد يرجع ، نجمو نرجو معاه عادي و كاينو ماصار شئ ؟! مام يقولو لي يحبك يرجع ميخليكش .. اما يرجع و يسكتك بكلمة ظروف ، لمحبة عمرها ماتصلحش لعبد الضعيف ، لمحبة تتأكد منها و قت تحس روحك إنك أقوى من مشاعرك و عواطفك ، لمحبة تتقاس موش بكلمة نحبك و منخليكش لمحبة أساسيتها اللهوة و لهوة عمرها ماكانت تخنق ، اللهوة تخلق للمحبة ، و كان متجيش كل يوم و كل ساعة لواش تصلح بجاه هالسماء ؟!
موش ساهلة ترجع تحكي مع إنسان بنيت معاه حلمات مزيانين و مع كل حلمة تزيد تكبش فيه أكثر ، موش ساهل ترجع و انت كل بلاصة في بدنك توجع ، موش ساهل ترجع و انت قلبك مزال مقهور .. قوتك تحددها بمدى قدرتك باش تسامح لعبد لي بكاك و قهرك ، قوتك تقيسهاا بقدرتك على كلامك معاه و كاينو ماصار شئ .. صحيح تموت حاجات و تحيا حاجات أما فيك من داخل شتبقى ديما حاجة ناقصتك حاجة فيك فارغة ، حاجة تلزك باش تتمني تقعد وحدك تبع روحك و تعيش لروحك .
فما برشا عباد عايشن في نعيم المحبة ، نجحو مع بعضهم بكلمة "نحبك كيما إنت" .. و ما فرضو على رواحهم شئ غير تعنيقة ساكتة  تحكي كل شئ .

لا أحد سوف يفهمك ، لا أحد يستطيع أن يوقف خدوش قلبك ، لا أحد سوف ينتبه لتلك الهالات السوداء التي تملأ اسفل عينيك ، لا أحد سوف يشعر بتلك الإرتعاشات الرقيقة التي تحدث تحت صوتك .  لا أدري و لكن بطريقة ما أريد أن يحبني أحد كحقيقة ، يكمن أن أكون أنا سبب المشكلة لأنني  إمرأة متملكة و أنانية ، شديدة الغضب لو إقترب أحد من أشيائي ، أصبح وقحة  و مستفزة،  أنا أعترف ...
 و أجدني في كل مرة  أبكي لأنني لا أستطيع حل هذه العقد .

كانت تريد أن تمسك بيديه و لا تجعله يذهب ، تخبره بأنها تتنفسه و أنها تحبه أكثر مما تحب أيام الربيع ، كانت تريده أن يشعر بسرعة خفقان قلبها و إرتعاش يداها و تخبره بأن رغبتها لا تريد النجاة منه ،كانت تريد كتفه أمانا يحتظن أوجاعها 
كانت تريد منه أن يوقف نحيب روحهاا و نفض الحزن عنهاا 
كانت تريد أن تخبره أنه  حبل نجاتها و وردة قلبهاا .. 
و لكن كيف ؟! 
و هي إمرأة الكبرياء ..